Jam 2 | BEF | STEP | Nalalu'nigitabe, lenali fana meha'a hiti bo, Sipi Bo Yesu Kilisitou kumu akeheli amuya mele'ahanamo ni'ibe. Bona'i luga'amu keke boke neli epelete bona'i luga'amu bu enogo he'milata nehana neminana yamofihi hena'mu ya suhi hilata nehabe? Ya suhi mehilo.

James 2

Bona'i fato fato'mofihi ka'a

1 Nalalu'nigitabe, lenali fana meha'a hiti bo, Sipi Bo Yesu Kilisitou kumu akeheli amuya mele'ahanamo ni'ibe. Bona'i luga'amu keke boke neli epelete bona'i luga'amu bu enogo he'milata nehana neminana yamofihi hena'mu ya suhi hilata nehabe? Ya suhi mehilo. 2 Bo moneuba fayaha'a gukete hekoloto yaha'aga ya'ma goli efatu lolo hi'ahana folotahi bito lenali sipi mono nonugu netinogo to bo mone salafa'a ai tafa gukete hekoloto tilina ya'ma, 3 lenali gukete hetofa'a hekolo'ehilina bomofihi bu gelete foke ka nelite sipi lamana'alo le'me nemelete salafa'amofihi ya'ma kai umaga buto ho tiloto minobo lite lilafiyhe? To meto fa'mene minobo lite li emilafiye? 4 Lenali ya hite bona'magita guna melete enele'mo fato fato nehite lenegekesa foipa'a kehelite bona'i enele'mo sibina hilata nehabe.

5 Nemehi nolepuna nalalu'nigita, ya'ma kaga kehelilo. Salafa'a bona'i nehabe lite nelite lilata nehana bona'i mone ya'ma Hu'mau enele'mo eto higo Hu'mamofihi gobisalo ya'ma fe'noha'ani hiti bona'i lolo hite nehabe. Ya nehago Hu'mamofitoga komopa'ani melete neminana bona'i ya'ma lu epolo'ehina suhi huto ai kapo'alo enele'mo hetofa hilina'mu yabe. To enali kehelise'na'ani aitoga ule'ale hiti le'mo sipi hilina'mu yabe. 6 Lenali salafa'amagi bu enogo he'milata nehanagi. To hiya huse bona'magi lenele'mo sibina hite ka foyagu lenele'me melelata nehabe? Enali fe'noha'ani hiti bona'magi yabe. 7 To lenigi'a liyafa hu'ehinana enali fe'noha'ani hiti bona'magi li sibina sabana nehabe.

8 To ya'mu mono bukugu Hu'mau keya ka lu'ehina kaguti amuya ka mone ma luto ni'ibe:Kaika'mu kehelilata nohata ya suhi huto kalalukagi kumu kehelito kaba hu epoloto komopaka epibo,luto lu'ehinamo ni'ibe. Lenali ana keya ka lu'ehina ka'a keheliya ilana ya'ma ana'ina lamana'a lilana ni'inaya. 9 To lenali bona'a mone'amagihi enofokehi hete enele'mo bati nehite bona'i mone'amagihi bu enogo he'milana nehite yamofihi foipana'a lilana'a huto ni'inaya Hu'mau ya'ma keya ka lu'ehina ka'a akeheli he'mi'ahabe luto ka foyagu lenele'mo melalina'mu yabe. 10 Bo moneuba Hu'mau keya ka lu'ehina ka'a keheli su hoto nekehelito moneko'isi he'milina yauba keya ka asaga'i pelesa neibe. 11 Hu'mau yama:A'i gumina mefalalo luto lu'ehina to ai mone hiti:Bona'i enoho mefililoluto molo'ehina. Lenali a'i gumina mefolose bona'i enoho fililana yamofihi Hu'mau keya ka lu'ehina ya'ma pelesa neibe. 12 Hu'mau lu laga huto lu'ehina kagauba lele'mo bati huto lubuto bi'ehina ka'a keheliya ilana'a hiti keheli he'milana'a hiti lele'mo nupa huto loko hu letalube'mu nohibe. Ya hu'ehina'mu kaga kehelite ana'ina nelite noluna kaga'mu kehelite minalo. 13 Bo mone'maka kai kiginaga mefinogo bona'i enele'mo bati mehilata ya'ma Hu'mau ana huto ginaga mefinogo enele'mo bati mehinogo ana bomofihi ka foya li etalune'mu nehabe. Kiginaga finogo keke'i luto enele'mo bati hilata bona'i ya'ma Hu'mau ana suhi huto ginaga finogo enele'mo bati hilube'mu nohibe. To ginaga fise nasanauba ka foya lilatanamofihi be ligilina'mu yabe.

Keheli amuya mololata nasana lamana'a ni'ibe.

14 Nalalu'nigitabe. Bo moneuba nani Yesu kumu keheli amuya molo'ohube luto lilina ai ya'ma mono ka lamana'a mone mege'i memelenogo sapuya'a lolo hilube'mu nohibe. Ya huloto keheli amuya moloto bilina ya'ma Hu'mau buto bilifihe? Bati mehu'ehina. 15 Bo moneubafi a'i mone'ifi silaga gukete'mufi nose'namu sa sa nehinogo, 16 lenalitogati moneuba ma luto lu epilina: Nalalu'nigitabe. Nehafihe? Bati hite minalo. To mukoho'a hiti lenumu hinogo minalo luto lu epilinaya enehe'moto enubuto mebilina yamofihi futu'a lilina'mu yabe. 17 Bona'i luga'amagi enali keheli amuya melete mono ka legeya'a mone melilana ya'ma Hu'mamofi kumu keheli amuya malalana'a pata si'ehinamo ni'ibe.

18 Bo moneuba noluna ka o'e a'e nolinogomo ma luto lu emilunamo ni'ibe: Kai ya'ma keheli amuya molo'ahataya nani ya'ma mono ka legeya'a lilata nohube. Mono legeya'a menelepise keheli amuya mololata hu'ahata'asigo nelepilata yamofihi nani mono ka legeya'a lilata nohuna ya'ma kelepinogo'ni keheli amuya nomolonamofihi hapa'a fa'mene kehelilane luto lilube'mu nohube. 19 Lenali ya'ma afotifu, Hu'ma moneko'isi nohibe lite lilata nehanafiye? Bati huto ya'ma ka legeya'a nelanaya foipa felemagi ana hite kehelilete sipi enelesa ligo topa hete nehabe. 20 Lenali ka keheli sibina hise naga'ise. Lenali kumu nolube. Bona'i luga'amagi keheliya ilana mono kamofihi legeya'a mone melilana ya'ma keheliya ise'na'ani pata si'ehibe luto nolube. 21 Tatatifihi Abalaha ai kumu lilugi keheli'ehilo. Hu'mau aimo henabe luto le'mo bati hu'ehibe? Mono ka keheli'ehinamofi kumu yabe luto le'mo bati hu'ehifiye? O'e. Ai Hu'mamofihi ka'a kehelito agoya hu emi'ehina'mu yabe luto le'mo bati hu'ehina. Abalahau ya'ma Hu'mau lu emi'ehina ka'a mege'i moloto pana'a Isakaha kuguhi koyo emilube'mu nohigo Hu'mau keheliloto le'mo lamana hu'ehina kaga ya'ma keheli'ahabe. 22 Ya hu'ehina ai keheli amuya molo lito buto mono ka legeya'a lito buto mono ka lamana'a lu'ehina yamofihi kehelito mino amuya moloto keheli su ho'ehinamofihi keheli'ahabe. 23 To mono ka bukugu ka mone ma luto ni'ibe:Abalahau ai Hu'mamofitoga agoya hu'ehina'mu yabe luto Hu'mau keheli emigo foipana'a meni'igo mino'ehinamo ni'ibe, luto lu'ehina. Hu'mau ai:Nibita hina nalalu'nifu nohibe, luto lulata nohibe. Abalahau ya'ma ana kagagu buto amuya molo'ehina yabe. 24 Kehelito amuya molose'natimu'i ya'ma keheliloto Hu'ma ai'a bulo fotogo hite nehabe luto melilune. Keheli amuya molo'ohutoti mono ka legeya'a liluta'mu keheliloto ai bulo bati hite nehabe luto lilune'mu nohune. Yamofihi akeheli'ahabe.

25 To ana suhi huto koyapa'i ya'ma kapolo a'i, Lehapu ai Hu'mamofi kumu yabe luto kaga mege'i molo'ehinalo Hu'mau nubulo bati a'i nohibe luto lu'ehina. Yosuagi to bona'amagi gelehe hite me'i kosaba'i bu galabe luto enoho lifinogo Lehapu nohinaga elago ai'a Hu'mamofihi naga'i nehabe luto enele'mo nonugu moloto bona'magi bu enegete enehe lalabe luto fato kapogu enoho lifi malago bi'ahana yabe. 26 To bo mone'mofihi gufa'a komopa'agu meha'a meni'igo fili'ehibe luto lilune. Ana huto bo moneuba keheli amuya malalinaya mono ka legeya'a melilina yamofihi keheli amuya molose'na'a asu ho'ehibe luto lilune.